رییس استخبارات روسیه می‌گوید که داعش برای هدف قرار دادن کشورهای آسیای مرکزی، در افغانستان پایگاه می‌سازد.

رییس استخبارات روسیه می‌گوید که داعش برای هدف قرار دادن کشورهای آسیای مرکزی، در افغانستان پایگاه می‌سازد.

به گزارش خبرگزاری جمهور به نقل از صدای امریکا؛ شبکه خبررسانی تاس روسیه از الکساندر بورتنیکوف، رییس خدمات امنیتی فدرال آن کشور نقل کرده که گفته است: "ما شاهد فعالیت‌های بیشتر شاخه‌های داعش در افغانستان هستیم."

این مقام روسی گفته است که داعش از تندروان کشورهای آسیای مرکزی برای انجام این حملات استفاده می‌کند.
این در حالی است که تاجیکستان روز چهارشنبه ادعا کرد که تروریستان داعشی از داخل خاک افغانستان وارد آن کشور شده و با نیروهای امنیتی آن کشور درگیر شدند.

مقامات تاجیکستانی گفتند که در آن حمله 15 تروریست کشته و پنج تن دیگر دستگیر شدند. دو منسوب امنیتی تاجیکستانی نیز در درگیری دیروز کشته شدند.

اما حکومت افغانستان این ادعای تاجیکستان را رد کرد.

روح الله احمدزی، سخنگوی وزارت دفاع افغانستان گفت که مقامات تاجیکستانی برای ثابت کردن ادعای شان اسناد و مدارک ندارند.

او گفت: " از خاک افغانستان بر آنان حمله نشده است و این برخورد در داخل خاک تاجیکستان با نیروهای آن کشور شده است و البته که دهشت افگنان داعش در داخل تاجیکستان حضور داشتند."

رییس استخبارات روسیه گفته است که گروه داعش شاخه های دیگر را در افغانستان متحد می‌سازد و با گروه‌های جماعت انصارالله و جنبش اسلامی ترکستان شرقی نیز همکار است.

خبرگزاری جمهور- کابل