سراج‌الدین مهر‌الدین وزیر خارجه تاجیکستان می گوید که موضع کشورش در مورد طالبان هیچ تغییری نکرده است.

به گزارش خبرگزاری جمهور؛ مهرالدین روز چهارشنبه (13 دلو) در یک نشست خبری در مقر وزارت خارجه تاجیکستان ابراز امیدواری کرد که طالبان عملا آمادگی خود را برای مذاکرات با رهبران همه گروه‌های سیاسی و قومی به نمایش بگذارد.

به گفته او، خواست جامعه جهانی از طالبان نیز تشکیل دولت واقعآ فراگیر است.

وزیر خارجه تاجیکستان همچنین در مورد تامین امنیت مرز تاجیکستان و افغانستان گفت که کشورش برای تحکیم مرزهای جنوبی خود تدابیر ضروری را در مشوره با کشورهای دیگر، در نظر خواهد گرفت.

او تاکید کرد که جامعه جهانی باید توجه خود را به حل سریع بحران شدید بشردوستانه در افغانستان متمرکز کند و در این زمینه تاجیکستان زیربنای حمل و نقل خود، از جمله 6 پل در گذرگاه‌های مرزی با افغانستان را برای انتقال کمک‌های بشردوستانه در اختیار سازمان‌های بین‌المللی قرار داده است. 

آقای مهرالدین گفت که تاجیکستان به انتقال پیوسته نیروی برق به ولایت‌های شمالی افغانستان و شهر کابل را ادامه‌ می‌دهد. 

پیش از این امامعلی رحمان رییس جمهور تاجیکستان در نشست مجازی کشورهای عضو "سازمان پیمان امنیت جمعی" پیشنهاد کرده بود که "یک کمربند امنیتی در اطراف افغانستان" ایجاد شود. 

همزمان، ولادیمیر پوتین، رئیس جمهوری روسیه هم در این ویدئو کنفرانس با اشاره به ناآرامی‌های اخیر قزاقستان گفت روسیه هرگز اجازه انقلاب در منطقه را نخواهد داد.

تاجیکستان 20 هزار نیروی اضافی به مرز این کشور با افغانستان اعزام کرده است.

پس از تسلط طالبان بر افغانستان این کشور چندین مانور مشترک یا مستقل نظامی را در مرز با افغانستان، انجام داده است.

خبرگزاری جمهور- کابل