جمهور - ابراز نگرانی سازمان بین‌المللی مهاجرت از اخراج مهاجرین افغان از پاکستان و ایران

ابراز نگرانی سازمان بین‌المللی مهاجرت از اخراج مهاجرین افغان از پاکستان و ایران

معاون سازمان بین‌المللی مهاجرت در افغانستان از اخراج اجباری مهاجرین افغانستان از کشور‌های پاکستان و ایران ابراز نگرانی کرد.

به گزارش خبرگزاری جمهور، وزارت امور مهاجرین و عودت‌کنندگان کشور بامداد امروز یکشنبه(26 حوت) در خبرنامه‌ای اعلام کرد که خانم موتیا مسکون، معاون سازمان بین‌المللی مهاجرت در افغانستان با مولوی عبدالکبیر، سرپرست این وزارت در کابل دیدار کرده است.

خانم مسکون از اخراج اجباری مهاجران افغان از کشورهای همسایه ابراز نگرانی کرده است.

خانم مسکون گفته است که اخراج مهاجران افغان از پاکستان مایه نگرانی است و این سازمان کمک‌های نقدی و غیرنقدی خود را برای مهاجران افزایش خواهد داد.

مولوی عبدالکبیر نیز با اشاره به اهمیت کمک‌های بشردوستانه به مهاجران، گفته است که امارت طالبان برای حل دائمی مشکل مهاجرت تلاش می‌کند و بر همکاری سازمان‌های کمک‌رسان در زمینه ساخت شهرک‌ها برای مهاجران تاکید کرده است.

خبرگزاری جمهور