مشرانو جرګې له افغان حکومت څخه وغوښتل، چې حلیم تنویز د خپلو وروستیو قومي نفاق اچوونکو څرګندونو له امله ونیسي او څېړنې ترې وکړي.
د جمهور آژانس د خبر له مخې د جرګې رییس فضل الهادي مسلم یار د نن سه شنبې لیندۍ ۱۹ مې په غونډه کې وویل، د افغانستان واړه قومونه د یوه باغ ګلان دي، خو حلیم تنویر د ځان شهرت موندلو لپاره د قومونو تر منځ د نفاق اچولو څرګندونې کړې او د یوه قوم پر وړاندې یې دنورو قومونو د درولو هڅه کړې.
نوموړي پر افغان حکومت غږ وکړ، چې تنویر افغانستان ته په راتګ سره ونیسي او یا یې هم د انټرپول پولیسو په واسطه هېواد ته راولېږدوي او څېړنې ترې وکړي.
مسلم یار ټینګار وکړ، چې تنویر په دغه څرګندونو سره د بهرنیو استخباراتي کړیو همغه د قومونو تر منځ د نفاق اچولو پروژه عملي کړې ده، چې باید پوښتنې ترې وشي.
هغه و ویل، مشرانو جرګه به کتبآ له حکومت څخه وغواړي، چې تنویر ونیسي او د څېړونو لپاره یې عدلي او قضايي بنسټونو ته معرفي کړي.
د جرګې لومړي مرستیال محمد علم اېزدیار هم د تنویر په څرګندونو خواشني وښوده ویې ویل، په خواشنۍ سره په افغانستان کې ځینې کسان د نفاق اچولو لپاره استخدام شوي، او بده لا دا چې دغه ډول کسانو د حکومت د ننه هم کار کړی او افغانستان یې د سقوط له ګواښ سره مخ کړی دی.
نوموړي په حکومت هم نیوکه وکړه، چې که په تېر کې یې له دغسې کسانو سره چې غواړي د بهرنیو استخباراتو پروژې پلې کړي او قومونه سره واچوي جدي چلند کړی وای، نن به چا دا جرات نه کولو، چې بیا دا ډول څرګندونې وکړي.
د یادونې ده، چې حلیم تنویر د علومو اکاډمۍ په یوه ناسته کې وايي، که چېرې زده واک ته ورسېدم، د قومونو تر منځ اختلاط یا ګډوالی رامنځ ته کوم، د هزاره لور د پښتون زوی ته ورکوم، په خدای ج ختموم یې، په خدای ج که یې پرېږدم.
هغه د خپلو څرګندونو په یوه بله برخه کې وايي، د قومي اختلافاتو د لمنځه وړلو لپاره باید قومي مشران له منځه یووړل شي، محقق او دوستم باید هغې خواته شي تر څو برابري رامنځ ته شي.
خو د تنویر دغه څرګندونو پر خواله رسنیو ګڼ غبرګونونه راپارولي او ان د ځینو قومونو مشرانو یې دغه څرګندونې ښکاره سپکاوی بللی دی.
جمهورخبري آژانس:عبدالله امیني
