د طالبانو د کورنیو چارو وزارت اعلان کړی چې د دې ډلې جنګیالیو د هیواد په څلورو ولایتونو کې د وسلو او مهماتو یوه لویه اندازه کشف او ترلاسه کړې ده.

د جمهور اژانس د راپور له مخې، د طالبانو ډلې تر کنټرول لاندې د کورنیو چارو وزارت د سې شنبې په ورځ (د وري ۱۹مه) په یوه اعلامیه کې وویل چې د ترهګرۍ ضد جنګیالیو په څو جلا عملیاتو کې له فاریاب ولایت څخه ۱۳ وسلې، په بلخ کې څلور وسلې او یو څه مهمات، له پروان څخه یو څه مهمات او د سمنګان ولایت څخه یوه بله وسله چې په غیرقانوني ډول ساتل کېده کشف او ضبط کړې ده.

طالبانو ویلي چې د فاریاب ولایت څخه درې کسان او په سمنګان کې یو بل کس د پورته ذکر شویو پوځي تجهیزاتو د غیرقانوني ملکیت په تور نیول شوی او له لومړنیو څېړنو وروسته، دوی د دغو ولایتونو قضايي ادارو ته سپارل شوي دي.

جمهورخبري آژانس