طالبانو په سرپل کې پنځه انسان تښتوونکي ونیول

د طالبانو د کورنیو چارو وزارت ویاند اعلان وکړ چې دې ډلې د سرپل ولایت څخه د تښتوونکو یوه پنځه کسیزه ډله نیولې ده.

د جمهور اژانس د راپور له مخې، د طالبانو د کورنیو چارو وزارت ویاند عبدالمتین قانع د دوشنبې په ورځ (د غوايي ۷ مه) په خپله فیسبوک پاڼه کې ولیکل چې د سرپل ولایت پولیسو ځانګړو ځواکونو پنځه تښتوونکي نیولي چې د عملیاتو په ترڅ کې یې د دې ولایت د یو اوسېدونکي د تښتولو پلان درلود.

طالبانو ویلي چې نیول شویو کسانو غوښتل چې یو کس وتښتوي او نامعلوم ځای ته یې بوځي ترڅو د هغه د خوشې کولو په بدل کې د هغه له کورنۍ څخه ۵۰۰،۰۰۰ ډالر وغواړي. له نېکه مرغه، دوی د پولیسو ځواکونو لخوا د خپل هدف ترلاسه کولو دمخه ونیول شول.

طالبانو ویلي چې له نیول شویو کسانو څخه دوه وسلې او یو موټر هم نیول شوي دي.

جمهورخبري آژانس